BOPK wa pay klaro

Cebu - Nagpabilin pang pangutana kun kinsa ang kandidato pagkakongresista sa Bando Osmeña Pundok Kauswagan (BOPK) sa habagatang distrito sa siyudad sa Sugbu sa 2010 elections.

Kini tungod kay hangtod karon, wala pa makapili si Mayor Tomas Osmeña kung kinsa ang paluyohan sa BOPK sa umaabot nga piniliay diha sa south district.

Nasayran nga gibutyag na niadtong Sabado sa Association of Barangay Councils (ABC) ang ilang paluyuhan nga mga kandidato sa dakbayan sa 2010 elections.

Kini mao sila si acting Mayor Michael Rama alang sa pagka-mayor ug education consultant Joy Augustus Young sa pagka-bise mayor.

Samtang sa pagka-kongresista sa amihanang distrito sa siyudad, ang anak usab ni Kongresista Raul del Mar nga si Rachel “Cutie” del Mar maoy paluyuhan sa ABC.

Matud ni ABC president Eugenio Faelnar nga makapila na niya suknaa si Mayor Osmeña nga mohingalan na sa ilang paluyohan nga kandidato pagkakongresista sa south district.

Apan matud ni Faelnar nga padayon pang gitimbang-timbang sa mayor ang paluyohan niining kandidato tungod kay kini dunay daghang gipilian.

“Dili baya lalim nga mangampanya ka ug ultima ora unya niingon man siya nako nga ayaw dayon og react kay mura man ta og nahadlok,” sumala ni Faelnar.

Lakip sa gipilian ni Osmeña mao sila si Konsehal Gerardo Carillo ug Rodrigo Abellanosa nga taud-taod nang mipadayag og interes pagpapili pagka-kongresista.

Interesado usab sa maong posisyon ang pag-umangkon sa mayor nga si Renato Osmeña Jr., nga igsoon ni Konsehal Richard “Richie” Osmeña.

Gikataho usab nga gidasig ni Mayor Osmeña si Presidential Management Staff (PMS) Director General Sec. Cerge Remonde nga mag-kongresista sa south district.

Nagtuo hinuon si Faelnar nga nakabintaha si Carillo sa gipilian ni Osmeña tungod kay kini giingong anaa na sa ikatulong termino sa pagka-konsEhal.

Gitataw hinUon sa ABC president nga bisan kinsa ang itudlo unya ni Osmeña nga kandidato sa south district, maoy ilang suportahan ug paluyohan sa umaabot nga piniliay. – BANAT NEWS