Carbon luwas na komprahan

Cebu - Gipasalig sa Cebu Market Vendors Development Cooperative (Cemvedco) nga mas luwas karon komprahan ang Carbon Public Market sukwahi sa gituohan sa uban.

Kini tungod kay giingong ubay-ubay ang mga civilian volunteer nga mitabang pagmintinar sa kahapsay ug kalinaw sa maong dapit gawas sa kapulisan.

Matud sa labaw sa Cemvedco nga Erwin Goc-ong nga tulo ka grupo karon ang niabag sa Carbon Police Station 5 pagbantay sa mga mangumprahay.

Kini mao ang giumol nga mga volunteer sa Cebu City United Vendors Association (CCUVA) ni Maria Pino, ingon man ang Team Carbon Action Force (TCAF) sa Cemvedco.

Sila si Pino ug Goc-ong nga mga konsehal usab sa barangay Ermita mitataw nga ang TCAF ug mga volunteer sa CCUVA giabagan usab sa mga tanod sa ilang barangay.

Gipadayag ni Goc-ong nga gusto nilang masiguro nga daghan ang mohatag og seguridad sa Carbon Public Market tungod kay kini gipaabot nga hugupan sa mga mangomprahay.

“Amo gyud nga gihingusgan ang paghatag og pagtagad sa peace and order kay expected man namo nga daghang mga working class nga ilang isakripisyo ang comfort sa mga malls tungod kay mahal ang palaliton didto unya ginagmay lang usab ang ilang paliton mao na nga ari sila sa Carbon, so, gi-doble sab nato ang siguridad diri” sumala ni Goc-ong.

Ang gihimo sa duha ka dagkong grupo sa mga vendors giingong nakab-ot human usab sa ilang gihimo nga panagsabot tali sa hepe sa Carbon Police Station.

Nagkanayon si Goc-ong nga sa matag roving sa iyang mga tawo (TCAF) kini ubanan og usa ka polis nga maoy mosupirbisar sa grupo.

Laing polis usab ang giingon ni Goc-ong nga mokuyog sa mga volunteer sa CCUVA ingon man sa mga barangay tanod sa Ermita.

Niingon si Goc-ong nga lakip sa gi-monitor sa mga anti-crime volunteer diha sa Carbon area mao ang mga mangunguot, manglabnihay ug mga tulisan.

Kini ilabi na panahon sa kagabhion nga nagpadayon ang mga kalihukan sa gilusad nga Pasko sa Carbon nga anaa na karon sa ikatulo ka tuig. – BANAT NEWS