Burlas pitolon ni Valmoria

CEBU - Walay katarungang magmaya ang usa ka polis sa lungsod sa Minglanilla tungod kay wala siya ikiha sa iyang gidapog ug gitionan og armas, kay ang iyang labaw’ng opisyal maoy mogukod kaniya.

Mao kini pintok nga pasidaan ni Sr. Superintendent Carmelo Valmoria, hepe sa Cebu Provincial Police Office (CPPO) kinsa nagkanayon nga siya ang mosang-at og kaso kang PO3 Client Burlas ug siya maoy mopitol niini.

Si Burlas sa sayo pa gikiha sa biktima sa usa ka drayber sa traysikol nga si Allan Cabañero, ug laing duha ka kauban niini ngadto sa Minglanilla Police Station sa miaging semana.

Kini human giingong gipanapog ug gipanionan og armas ni Burlas ang mga biktima.

Apan nasayran ni Valmoria nga miatras ug dili na mopadayon sa pagsang-at og kaso batok kang Burlas ang mga biktima.

Maoy hinungdan nga si Valmoria gibatig kalagot ug misaad nga siya modisiplina kang Burlas.

Gawas sa rekord niini diha sa Minglanilla Police Station, misaad si Valmoria nga hastang rekord ni Burlas sa nadestino pa kini sa Talisay, iyang utingkayon.

Kini sa tinguha ni Valmoria nga kasilotan si Burlas ug mahimong sumbanan sa mga polis nga abusado ug walay pagtahod sa katungdanang gipiyal kanila sa gobyerno. (BANAT NEWS)