Piniriso sa Talisay may bundle of joy

CEBU - Ang mga piniriso sa Talisay City Jail nakadawat kagahapon og mga ‘”bundles of joy” gikan sa Talisay Aqua City Gun Club (TACGC) nga gipangulohan ni kanhi Bise Mayor Aberdovey Belleza.

Si Johnson Calub, warden sa Talisay City Jail (TCJ) mibutyag nga ikatulo na karong tuig nga walay bugto sa pagpanghatag og pahalipay ang maong grupo ngadto sa mga binilanggo sa dakbayan.

Gibutyag ni Calub nga nagkaguliyang ang mga piniriso sa kalipay tungod sa pinaskohan nga ilang nadawat gikan sa TACGC.

Matud pa ni Calub nga mikabat sa 332 ang mga piniriso karon sa TCJ diin 43 niini mga babaye nga nag-ukopar sa unom ka cottage.

Miingon si Calub nga nagkinahanglan ang city jail og laing cottage karon tungod kay milapas na sa kapasidad nga   221 ka mga piniriso lang unta ang sulod sa maong prisohan hinungdan nga imbis tag 40 lang ang ikasulod sa matag cottage, sa pagkakaron nahimo nang 50 ang gisulod niini.

Gibutyag usab ni Calub nga 60 porsyento sa mga piniriso ang nalambigit sa kaso sa illegal nga drugas ug hinoon malinawon sila sa sulod sa TCJ kay limpyo ang palibot ug pabor kaayo sa bugnaw nga hoyuhoy sa hangin .

Si Belleza kinsa maoy kapikas ni Konsehal Shirley Belleza sa dakbayan sa Talisay nagkanayon nga mao kini iyang kalipay nga makahatag og pinaskohan bisan ginagmay ngadto sa mga piniriso sa dakbayan ilabi na nga nakaila na niya kini kay ang ilang firing range anaa ra mahimutang sa likod sa TCJ. (BANAT NEWS)