NAVFORCEN nadiskaril 17 angol

CEBU - Naangol ang napulo ug pito ka mga sakop sa Naval Forces Central (NAVFORCEN) dihang nawagtangan og preno ang ilang sakyanan ug nalintuwad sa 100 piyes nga giladmon sa lupot didto sa sitio Buli, barangay Cansomoroy, lungsod sa Balamban kagahapon sa alas 7:00 sa buntag.

 Si Lt. Cristina Aurellano , information officer sa NAVFORCEN mibutyag sa Banat News ug miila sa mga angol nga mao sila si Lt. Anchises Diola , NS Nolan Baria, ENC Arturo Bermijo, PO3 Harvey Abella, FNS Paul Flores, PO3 Jose Enolba, PO3 Ernesto Animas, PO3 Emilio Genon, SSgt. Eugene Genore, Henifer Obiso (midwife), mga volunteer nurses nga sila si Nievel Grace Octiaso, Naome Sabandal, Imie Divinagracia, Olive Cristine Pacaldo, Albert Pocane, Allan Ramos ug ang driver niini nga si FN1 Roland Dominique Enriquez. 

 Matud pa ni Lt. Aurellano nga ang grupo mibiyahe paingon sa lungsod sa Tuburan sa amihanang bahin sa lalawigan, alang sa usa ka medical mission dihang pag-abot nila sa usa ka lugsungong bahin sa highway, nawad-an og kontrol ang M35 military truck nga ilang gisakyan gumikan sa pagkawagtang sa preno niini.

 Ang drayber nga si FN1 Enriquez walay nahimo gawas sa pagpahiuyon nalang sa dailos sa sakyanan paingon ngadto sa kinahiladman sa lupot.

.Apan matud pa ni Lt. Aurellano, nga nahuwasan ang tanang sakay dihang kalit lang nahunong sa pagdailos sa sakyanan dihang nabanda kini sa dakong punuan sa kahoy ug nasangit pipila ka metros nalang gikan sa lawom kaayong pangpang sa ubos.

Gumikan sa kakusog sa pagkabanda niini sa kahoy, nawagtang usab ang usa sa mga ligid sa sakyanan, apan bisan pa napugngan gyud sa kahoy ang sakyanan.

 Ang mga biktima nakasinati og mga samad ug bun-og sa kalawasan gikarga dayon sa ambulansya sa militar ug mihakot sa mga biktima ngadto sa   Balamban District Hospital ug ang uban gidala ngadto sa Chong Hua Hospital.

 Matud pa ni Lt. Aurellano nga wala makapabalaka sa mga sundawo ang maong hitabo sanglit nasayod na sila nga ang ilang kinabuhi kanunay nga naglatay sa usa ka lugas lanot.

Kundili sila mamatay sa bala, anha sa disgrasya , apan kun palahutayon ang kinabuhi makaabot gyud sila sa tukmang edad sa pagretiro gikan sa ilang serbisyo, matud pa ni Aurellano.

Miingon si Aurellano nga ang NAVFORCEN dili moundang sa ilang misyon sa paghatod og serbisyo ngadto sa katawhan nga nagkinahanglan sa ilang pangalagad

Midugang si Aurellano nga inigkaayo sa mga samad ug bun-og sa mga angol, mopadayon sila sa ilang medical mission sa Tuburan. (Uban ni Rica Calinawan, USJR Intern) (BANAT NEWS)