'Bodoy' sa Pasil gipatay

CEBU - Patay diha-diha gilayon ang usa ka mangayuhay og sapatos human gipauwanag mga bala sa duha ka mamumuno nga nagsakay sa motorsiklo mga alas 11:15 niadtong Huwebes sa gabii diha sa dalan Magsaysay   Sitio Lawis barangay Pasil, ning dakbayan.

Ang namatay giila sa kapolisan nga si Rodulfo Torniado Baron alias “Bodoy,” 34, nagpuyo sa nahisgutang lugar kinsa naligo na sa kaugalingong dugo diha sa tunga sa karsada sa dihang naabtan sa mga miresponding kapolisan.

Sa imbestigasyon nila ni SPO2 Rey Cuyos ug mga kaubanan sa Homicide Section sa Cebu City Police Office ang biktima gikatahong nagbaligya og manok igtatari nga gikan sa ginganlan og Jun-Jun Amigable sa dihang kalit lang gipusil sa duha ka mga mamumunong nagsakay sa kolor green nga motorsiklo kinsa dali kaayong nakasibat human sa krimen.

Si Baron   namatay diha-diha human nakaangkon og samad pinusilan sa iyang walang kilay, luyong bahin sa ulo, ingon man sa iyang luyong bahin sa lawas.

Ang kapolisan nakakuha og usa ka kabhang sa .45 didto sa crime scene ingon man usa ka helmet sa motorsiklo nga gi-turn-over sa mga estambay didto sa lugar human matud pa natagak gikan sa misibat nga mamumuno. – BANAT NEWS