Traffic enforcer naligsan

CEBU - Patay ang usa ka traffic enforcer human naligsan og trak de karga nga puno sa sinakong harina samtang nagmaneho sa trapiko alas 7 pasado ang takna sa buntag kagahapon sa eskina United Nation Avenue ug dalan Plaridel sa barangay Umapad, dakbayan sa Mandaue.

Ang napigsat human malatayi sa ligid mao si Jojie Dalida, 29, ulitawo nga taga barangay Subangdaku, dakbayan sa Mandaue ug sakop sa Traffic Enforcement Agency (TEAM) sa dakbayan sa Mandaue.

Ang   nakaligis sa biktima mao ang trak nga gimaneho ni Armado Jory Lubaton, 45, minyo nga taga Zone 4,   barangay Canduman, dakbayan sa Mandaue ug drayber sa Isuzu truck nga nagtangag sa plate number GXG 710   nga nagkarga sa sinakong harina sa General Milling Corporation sa barangay Pajo, dakbayan sa Lapulapu.

Si PO2 Ruben Serdania, imbestigador sa traffic section sa Mandaue City Police Office (MCPO) mitug-an nga gikan sa dakbayan sa Lapulapu ang trak de carga ug nagdulhog kini nga nagdagan gikan sa Marcelo Fernan Bridge ug nagbarog samtang didto ang biktima sa taliwala sa karsada.

Sa paghidangat sa eskina dalan Plaridel ug dalan paingon sa Paknaan   gihimo sa biktima ang pagsinyas sa pagpahunong sa mga sakyanan gikan sa dakbayan sa Lapulapu sa paghatag og higayon nga makaagi usab ang mga sakyanan nga molabang sa eskina paingon sa Paknaan.

Nunot sa mao niyang pagsinyas   gihimo sa biktima ang pagtalikod gikan sa mga sakyanan sa dakbayan sa Lapulapu   ug gisinyasan ang mga sakyanan nga mopaingon sa Paknaan sa pagpadagan.

Dugang pa ni Serdania nga ang track de carga nga gimaneho ni Lubaton kalit lang nga nawad-an sa iyang preno ug nag-aginod kini nga nagdagan paingon sa nahimutangan sa biktima.

Si Serdania miingon nga gialegar sa drayber nga naharos ang preno sa gimaneho niining trak de carga ug wala kini bosina nga maoy hinungdan nga nagpunay na lamang kini og singgit sa paglikay apan wala   makadungog ang traffic enforcer hangtod nga naligsan nga maoy nakaingon sa kamatayon niini.

Ang mga imbestigador mosusi hinuon sa alegasyon sa drayber kinsa pasakaan og tukmang kaso tungod sa kamatayon ni Dalida. – BANAT NEWS