Pyro zone gibutang sa SRP

CEBU - Giila na sa konseho sa dakbayan sa Sugbu ang dapit sa siyudad nga mahimong makabaligya ug makapabuto og mga firecrackers.

Kini aron sa paglikay sa posibleng kadaut nga mahatag sa mga pabuto niining panahon sa Pasko ug Bag-ong Tuig sama sa sunog ug uban pa.

Ang nakita sa City Council nga dapit nga haum sa maong matang sa patigayon mao ang South Road Properties (SRP).

Kadtong mga pabuto ug ubang pyrotechnic devices nga gi-display gawas sa SRP mahimo nga sakmiton sa mga otoridad.

Kini gipahaum usab sa City Ordinance Number 82 ug City Ordinance Number 1962 nga nag-regulate sa pagpamaligya og mga firecrackers.

Si Konsehal Augustus Pe Jr., maoy mipalabang og resolusyon atol sa miaging sesyon sa konseho nga nag-designate sa SRP isip pyrotechnic zone.

Ang lakang sa konsehal gipasubay usab sa rekomendasyon sa City Fire Department, City Health Department ingon man sa kapolisan ug sa ubang ahensya sa gobyerno.

“To balance public interest, it is recommended that Cebu City shall designate a firecracker/pyrotechnic zone and for this purpose, nowhere in the City is more than ideal than the South Road Properties,” tipik sa resolusyon ni Pe.

Sa iyang bahin gipadayag ni acting Mayor Michael Rama nga dili na bag-o ang pag-designate sa SRP nga pyrotechnic zone.

Apan taliwala niini, nagtuo ang acting mayor nga dili gihapon mawagtang ang pagpabuto sa mga firecrackers gawas sa SRP.

Subay niini, gisangunan ni Rama ang kapolisan sa dakbayan nga maoy mopatuman sa nalatid sa ordinansa sa siyudad labot sa mga pabuto.

Sa samang higayon mipahinumdum usab ang acting mayor ngadto sa mga Sugbuanon sa posibling dangatan mugna sa mga firecrackers.

“Firecrackers is hazardous to your hands, limbs and properties and most of all it contributes global warming,” matud ni Rama. – BANAT NEWS