Koreano kadam-ag 4-anyos

CEBU - Nagpabilin pa sa tambalanan dinhi sa dakbayan sa Sugbu ang 4-anyos nga batang lalaki human kini makaangkon og kadaot sa iyang ulo ug kalawasan sa dihang nadasmagan sa multicab nga gimaneho sa usa ka Korean national niadtong Miyerkules sa alas 11 sa buntag didto sa National Highway, Sitio Bia-ong, barangay Dakit, lungsod sa Barili.

Ang biktima giila sa kapolisan nga si Tim Walter Alvarado, 4-anyos, taga Sikatuna Riverside, dakbayan sa Sugbu samtang ang nakadasmag mao ang Korean national nga si Kom Yong Sik, 30, ulitawo, residente sa barangay Pinagsama, lungsod sa Moalboal kinsa mitahan sa kapolisan.

Si SPO2 Moises Cantilla sa Barili Police Station miasoy nga ang 4-anyos nga bata uban sa iyang inahan nga si Rhea sakay sa usa ka kotse gikang nangaligo og dagat sa dihang mihunong aron mamalit og makaon.

Pagkanaog, wala mabantayi ang bata nga midagan sa karsada hinungdan nga nadam-agan sa multicab nga gimaneho sa Koreano.

Ang Koreano wala hinuon bilanggoa human miabag sa pagpa-ospital sa bata. Ang inahan nagkanayon nga ang bata nagreklamo sa kasakit sa ulo nga gituohang adunay blood clot. – BANAT NEWS