Laing Warrant vs. Joavan

CEBU - Sulod sa duha ka bulan nga pagpakahilom sulod sa bilanggoan ni Joavan Fernandez, ang kontrobersiyal nga sinagop ni Mayor Socrates Fernandez sa dakbayan sa Talisay, nabaniog og balik ang iyang ngalan human ang korte miluwat og warrant of arrest.

Ang warrant of arrest tungod sa kasong robbery giisyo ni Regional Trial Court Judge Bienvinido Saniel Jr. sa Branch 20.

Gi-serve sa kapolisan sa Talisay ngadto sa Talisay City Jail sa barangay Maghaway ang warrant batok ni Joavan niadtong miaging adlaw.

Si Supt. Henry Binas, hepe sa Talisay City Police Station, sa pakighinabi niini sa Banat News kagahapon sa buntag nagkanayon nga gi-serve nila ang nahisgotang warrant ngadto kang Joavan aron magpa-ubos kini sa hurisdiksiyon sa korte.

Si Biñas kinsa usa usab ka abogado mibutyag nga P100 mil ang gitugot nga piyansa sa kaso nga robbery ug kun ugaling makalingkawas si Joavan sa kasong serious illegal detention, magpabilin gihapon kini sa prisohan tungod sa kasong robbery ug makagawas lang kini kun makabutang og piyansa.

Kahinumduman nga si Joavan gipasakaan og kasong robbery ni Mercidita Abellana, iyaan nila ni Osbert ug Winston nga giingong gitanggong ni Joavan.

Apan si Mercedita ug Winston miluwat og affidavit of desistance sa rason nga dili na sila gusto og kasamok ug gusto ni Mercedita nga makabalik na sila og pangabli sa ilang vulcanizing shop.

Apan bisan pa og miatras si Mercedita ug Winston, giduso gihapon ni Talisay City Prosecutor Marcial Rubia ngadto sa korte ang kaso.

Si Biñas mipasabot nga kun dunay bug-at nga ebidensiya, bisan pa og miatras ang naargabiyado, mopadayon gihapon ang kaso.

Apan kun walay masumiter ngadto sa hukmanan nga mga lig-ong ebidensiya posibleng mabasura ang kaso ug kung ang nabiktima mobakwi gyud sa ilang testimoniya, ang huwes na niini ang mohukom kun balido ba ug angayan nga makonsiderar ang maong pagbakwi.

Kahinumduman nga ang mag-agaw'ng Osbert ug Winston Abellana mireklamong gipangulata ni Joavan ug gipangtanggong human mawagtang ang ligid sa sakyanan ni Mayor Socrates Fernandez nga gipatapakan sa vulcanizing shop nga gipanag-iya sa iyaan sa duha nga si Mercedita Abellana.

Si Mercedita misang-at og kasong robbery tungod sa pasangil nga gikuha ni Joavan ang iyang DVD player ug TV set aron "ipakang" sa nawala nga ligid. Hangtod karon, wala mauli ni Mercedita ang DVD player ug TV set.

Apan si Mercedita misibog sa kaso. Mitumaw ang pasangil nga ang iyang pagsibog tungod sa P10 mil nga gihatag ni Mayor Fernandez, samtang si Winston gitanyagan og trabaho sa City Hall ug gipaubos sa scholarship ang anak niini.

Si Osbert mipadayon sa kasong serious illegal detention. Gani, giubanan kini sa amahan nga si Oscar ngadto sa Department of Justice pag-aplay sa witness protection program sa kagamhanan. – BANAT NEWS