Tabang sa hospital sa Mandaue gihangop

CEBU - Gihangop sa kagamhanan sa dakbayan sa Mandaue ang tabang sa usa ka pribadong institusyon nga miboluntaryo sa pagpamintal ug pagdugang og kahimanan sa duha ka mga ward sa Mandaue City District Hospital.

Si Mandaue City Health Officer, Dr. Oscar Quirante miingon nga ang Philippine Paramedical and Technical School (PPTS) pinaagi sa ilang presidente nga si Jake Marquez mipalambo sa pediatric ward pinaagi sa pagdugang og mga katre ug lingkoranan unya mipintal niini niadtong miaging buwan .

Matud pa ni Quirante nga ang PPTS maoy ikaduhang pribadong institution nga mibulontaryo sa pagpalambo sa kahimtang sa mga lawak sa maong tambalanan.

Ang unang miboluntaryo sa paghatag og mga katre ug lingkoranan uban sa pagpintura sa mga lawak sa maong tambalanan mao ang University of Cebu.

Kahinumdoman nga ang District Hospital sa Mandaue gihatagan og maayong hitsura uban sa mga kahimanan sa panahon pa ni kanhi Mayor Thadeo Ouano.

Kini human itugyan sa kagamhanan sa lalawigan ang pag-atiman sa maong tambalanan ngadto sa lokal nga kagamhanan sa dakbayan sa administrasyon pa ni Ouano. – BANAT NEWS