Patay sa dagat ilhan na

CEBU - Nailhan na ang usa ka mananagat nga nakit-ang patay nga naglutaw -lutaw sa kadagatan sa barangay Daanlungsod , lungsod sa Medillen niadtong Lunes sa alas 7:00 sa buntag.

Ang mga kabanay sa biktima miila sa biktima nga si Zuilo Gonzaga Nudalo, 67, usa ka mananagat nga taga Kawit sakop sa maong lungsod.

Si SPO1 Roland Reyes sa Medillen Police Station mibutyag sa  Banat News nga ang biktima bag-ohay pang nakagawas sa tambalanan human ma-admit tungod sa altapresyon kon high blood.

Apan nianang pagka Lunes sa kaadlawon mipugos gyud kini sa pagpanagat nga nag-inusara sakay sa iyang pumpboat ug mao nalay nakit-an sa ubang mga mananagat nga wala na kini kinabuhi nga naglutaw -lutaw sa dagat .

Gituohan sa kapolisan nga gi-atake ang biktima samtang kini nanagat apan walay nakatabang kaniya tungod kay nag-inusara lang kini hinungdan nga natagak sa dagat ug nalumos patay. – BANAT NEWS