Manager gikasoha'g 'human trafficking'

CEBU - Kasong paglapas sa balaod sa Human Trafficking maoy gipasaka sa kapolisan sa Lapulapu City batok sa tag-iya ug manager sa usa ka bar kansang mga dancer nga babaye giingong nakighilawas sa ilang mga kustomer nga lalake.

 Si Lapulapu City Police Office OIC Director P/Ssupt. Mariano Natu-el Jr. mibutyag sa Banat News nga gibuhian na nila ang walo ka mga babaye nga ilang nasikop dihang ilang gironda ang Brilliant Mini Bar niadtong miaging gabii kay milapas na sa reglamentary period ang ilang pagdetiner niini.

Samtang ang tag-iya sa maong establisamento nga si Jason Colina kinsa nagpabiling gawasnon ug ang floor manager niini nga si Yolanda Ala maoy nagpabiling gibalhug sa detention cell sa kapolisan human kini pasakai og kasong kalapasan sa Article 9208 sa Revised Penal Code kon Human Trafficking law ngadto sa Lapulapu City Prosecutors office gumikan sa pagbaligya sa iyang mga entertainer ngadto sa mga customer.

Matud pa ni Ssupt. Natu-el nga magpadayon ang ilang operasyon sa mga balay kahilayan sa dakbayan sa Lapulapu nga magpasundayag og mga malaw-ay nga talan-awon sama sa hubohubo ug ang paglambigit niini sa prostitusyon.

Kahinumdoman nga siyam ka mga babayeng mananayaw lakip na ang floor manager sa Brilliant Mini Bar nasikop dihang gironda sa kapolisan sa dakbayan sa Lapulapu uban sa usa ka “decoy” kinsa maoy miarangkada sa pakighilawas ngadto sa usa ka GRO sulod mismo sa maong establisamento.

Atol sa maong pagpangronda nakasibat ang tag-iya niini nga si Colina ug bugtong si Ala, ang manager, maoy nasikop sa mga operatiba ug maoy pormal nga gipasakaan og kaso sa kapolisan. – BANAT NEWS