Tawo giluba sa kainom patay

CEBU - Patay ang usa ka tawo human kini dunggaba sa gikainom niyang silingan didto sa sitio Galaxy, barangay Maguikay, dakbayan sa Mandaue niadtong Huwebes sa alas 3:00 sa kaadlawon.

Ang namatay giila nga si Alfonso Villa Zapanta, 45, ulitawo ug ang suspetsado mao si Bernabe Lumbab, 30 , minyo ug silingan sa biktima .

Sa imbestigasyon sa homicide section nga gipangulohan ni Inspector Rainerio Cortes, nasayran nga gikainom sa biktima ang suspetsado sa maong dapit.

Sa tanto nilang inom nakahukom ang biktima sa pagbiya aron mopauli na kay katugon na siya.

Apan matud pa, puwerting sukoa sa suspetsado kay dili kini gustong biyaan sa biktima.

Sa iyang kalagot milanit kini og kutsilyo ug gihansakan ang walang dughan sa biktima nga maoy namatyan sa naulahi.

Ang team sa kapolisan sa Presinto 4 sa Casuntingan Police Station nga mitubag sa maong alarma maoy nakadakop sa suspetsado.

Ang biktima nadala pa sa Mandaue City Hospital apan tungod sa kagrabe sa samad sa dughan gideklarar kini sa mga doktor nga dead on arrival.

Ang kasong homicide maoy giandam karon sa kapolisan batok sa suspetsado nga nagtingkagol na karon sa bilanggoan. – BANAT NEWS