Oaminal mideklarar og gubat

CEBU - Si Undersecretary Clarence Paul Oaminal sa Dangerous Drugs Board (DDB) mideklarar nga ubos sa “state of war” karon ang DDB batok sa mga tawong maoy utok ug nagpaluyo sa pagpayuhot sa ginadiling drugas ilabina dinhi sa Sugbu.

Ang maong deklarasyon ni Usec. Oaminal maoy bunga sa iyang kadismaya ug kasubo dihang naangol ang usa ka ahente sa Philippine Drug Enforcement Agency (PDEA) kay napusilan sa bukobuko atol sa ronda nga ilang gihimo didto sa barangay Ermita niadtong miaging adlaw.

Sa interview sa DYRF, si Usec. Oaminal mipasidaan sa katawhan nga matud pa "ning panahona, ania kita sa state of war ug kasamtangan nga nakiggubat batok sa illegal nga drugas."

Si Usec. Oaminal mikombinse sa publiko, ilabina na sa lugar nga daghan og molupyo sama sa Ermita, nga mosuporta sa mga programa sa kagamhanan batok sa sindikato sa ginadiling drugas.

Matud pa niya nga gikinahanglang modapig ang katawhan sa gobyerno ug dili kay adto sa mga drug lord.

Iyang gipasabot nga may duha ka matang sa tawo nga ilang ilhon, una mao ang tawgon og "patriot" kun tawo nga molaban sa nasud batok sa ginadiling drugas, ug ang ikaduha mao ang tawo nga mobaligya sa kalag kay adto moalagad sa sindikato sa druga, nga ilang pagatawgon og "traydor “. – BANAT NEWS