Abagahon sa kagamhanan sa dakbayan sa Sugbu ang bayranan sa tambalanan sa usa ka confidential agent sa Philippine Drug Enforcement Agency (PDEA-7) nga napusilan atol sa gipahigayong pagpangronda niadtong miaging semana diha sa barangay Ermita.
Wala pa masayri kung kinsa angnakapusil sa PDEA agent nga si Española nga padayon pang nagpaalim sa samad nga nahiaguman sa iyang buko-buko.
Matud ni Konsehal Sylvan Jakosalem nga iyang gisugyot ngadto kang acting Mayor Michael Rama nga bayran sa siyudad ang hospital bills ni Española.
Kini human usab personal nga mibisita sa buhatan sa konsehal si Dangerous Drugs Board (DDB) Vice ChairmanClarence Paul Oaminal.
Ang DDB Vice Chairman uban kang PDEA-7 Director Randy Pedroso ug sa ilang tigpamaba nga si Jessie Tabanao mihangyo kang Jakosalem nga katabangan si Española.
Hilabihang lipaya sa maong mga opisyal sa dihang sila gipahibawo sa konsehal nga misugot si Rama sa rekomendasyon niini.
Laing katuyoan nilang Oaminal ngadto kang Jakosalem mao usab ang paghatag niini og mga kalambuan sa sitwasyon sa ginadiling drugas sa dakbayan.
“Mihatag mi og report sa drug situation sa Cebu City aside from asking him nga katabangan ang atong civilian agent sa iyang hospital bills,” sumala ni Oaminal.
Midugang si Oaminal nga sila nagmadaugon na sa ilang pagpakiggubat batok sa ginadiling drugas uban sa pagtuo nga makab-ot ang ilang gitinguha sa tuig 2010.
Masaligon ang DDB Vice Chairman nga mamahimo na unyang drug-free ang nasud partikular na ang Sugbu duha ka tuig gikan karon.
Butang hinuon nga wala uyoni ni Jakosalem tungod kay sama sa ubang mga opisyal sa siyudad nakita usab niini nga nakagamot na ang maong problema.
Apan nagtuo ang konsehal nga maminusan ang nahisgutang suliran tungod sa gihimong mga operasyon sa mga law enforcement unit sama sa PDEA. (Elly Bolonos)