Nagpa-rollback sa plete ang mga barko

Labing minos pito ka mga kompaniya sa barko dinhi sa Sugbo ang mipatuman og dakong rollback sa pletehan taliwala niining padayong pagkunhod sa presyo sa produktong petrolyo.

Subay sa rekord sa Maritime Industry Authority (MARINA-7) nagpakita nga dunay pito ka mga shipping company misang-at og petisyon nga nananghid alang sa ilang pagpatuman og rollback sa pletehan gikan sa 10 porsiyento ngadto sa 47 porsiyento.

Apan nasayran gikan ni Engr. Renier Dueñas, supervising marine industry development specialist sa Marina-7 dihang nahinabi sa Banat News nga ang labing dako og gipatuman nga rollback mao ang Asian Marine Transport Corporation nga nagpahibalo nga mopatuman sila og promosyon sa ilang mga sumasakay nga libre ang plete gikan ning bulana hangtod saFebrero 28 sunod tuig.

Ang ubang mga kompaniya nga mipatuman og rollbackmao ang Island Shipping, George and Peter Lines, Southern Pacific Transport, Roble Shipping, Kenswell Shipping ug Jade Star Shipping.

Ang Island Shipping mipatuman og 10 ngadto sa 47 porsiyento nga rollback sa plete sa mga biyahe niini nga Cebu Talibon, Hagnaya Sta. Fe ug Cebu Tubigon, samtang 9 ngadto sa 16 porsyento ang gipatuman nga pagkunhod sa plete sa Jade Star nga nagbiyahe-an sa Cebu-Tubigon, samtang 44 porsiyento ang gipatuman sa George and Peter Lines ingon man 10 ngadto sa 20 porsiyento ang gipatuman nga rollback sa plete sa Southern Pacific ug Kenswell shipping samtang libre ug walay bayad ang Island Shipping nga biyahe sa Hagnaya Sta Fe.

Matud ni Engr. Duenas nga mipatuman og pagpakunhod sa plete ang maong mga shipping companies tungod sa padayong pagkunhod sa presyo sa diesel ug mi-epekto dayon kini sukwahi sa petisyon alang sa pagpangayo og usbaw sa plete nga gikinahanglan pa nga ipublikar sa pamantalaan ug una pa mo-epekto human sa pito ka adlaw.

Dinhi sa Central Visayas dunay dili mominos 109 ka mga shipping companies nga nag-operate apil na ang mga motor banca nga nagbiyahean dinhi sa Metro Cebu. (Darrel A. Carumba)