BOPK hadlok ni Georgia O.

Nahadlok ang mga sakop sa Bando Osmeña Pundok Kauswagan sa pagtumaw sa manghod ni Mayor Tomas Osmeña nga si Georgia Osmeña nga gikahadlokang modagan usab pagka-mayor bisan walay bendisyon sa iyang maguwang.

Kini ang mitumaw karon sa dihang ang mga konsehal nga ubos sa BOPK nagkara-kara karon sa paghimo usab og linain nga healing mass alang kang Mayor Osmeña bisan sa nahauna nga gipahibalong healing mass nga ilusad ni Georgia alang sa iyang maguwang nga tua karon sa Estados Unidos nagpaalim sa sakit nga kanser sa pantog.

Nakadesisyon ang mga sakop sa BOPK paghimo og bulag nga healing mass human masayri nga si Georgia nangimbitar og mga “political personalities” diin usa niini ang kaaway ni Mayor Osmeña nga si Gobernador Gwendolyn Garcia.

Gituohan usab nga motambong sa healing mass ang mga sakop sa oposisyon sa dakbayan.

Ang nahisgutang lakang ni Georgia gisaway hinuon ni Mayor Osmeña pinaagi sa paghulagway niini nga usa lang ka “political gimmick”. Tungod kini sa pagtuo nga atbangan ni Georgia ang standard-bearer sa BOPK nga si acting Mayor Michael Rama.

Mitumaw ang maong posibilidad human magparehistro ang manghod sa mayor niadtong miaging semana diha sa Cebu City Comelec Office.

Ang mayor gikataho nga mipugong sa iyang mga tigpaluyo ug kaalyado nga motambong sa pasiugdahan nga healing mass ni Georgia.

Tungod niini, ang pag-umangkon sa magsoong Osmeña nga si Konsehal Richard “Ritchie” Osmeña misugyot nga mopahigayon usab sila og kaugalingong healing mass.

“Ingon man kaha si Mayor Tom nga dili mi patambungon, mas maayo tingali nga mopahigayon sab mi og kaugalingong Healing Mass,” sumala ni Osmeña.

Una nang gipadayag ni Ritchie nga siya maminaw ug musunod sa isutli sa iyang uyoan nga mayor kay sa iyang iyaan nga si Georgia bisan kung kini iya usab nga suod.

Nagdumili hinuon pagkomentaryo ang konsehal kung usa lang ba ka political gimmick ang pasiugdahan nga kalihukan sa iyang iyaan.

Apan sama sa ubang kaalyado sa mayor nagduda usab si Ritchie nga gipaluyuhan ni Gobernadora Garcia ang pagtumaw sa pangalan ni Georgia sa natad sa politika sa Sugbu.