CEBU – Nanumpa na kagahapon sa pagka-kapitan ang numero unong konsehal sa barangay Bulacao sa dakbayan sa Sugbu nga si Jose Gabiana nga maoy nihulip sa gibiyaang katungdanan ni kapitan Romeo Alit nga mitaliwan na ngadto sa laing kalibotan.
Si Alit giatake sa sakit sa kasing-kasing niadtong miaging adlaw ug wala na matabang sa mga mananambal paghidangat sa tambalanan.
Si Gabiana giubanan sa iyang mga kaubang opisyal sa Bulacao nga mihural ngadto kang Acting Mayor Michael Rama.
Una nang gipadayag ni Gabiana nga iyang ipadayon ang mga programa nga gisugdan ni Alit nga alang sa kalamboan sa ilang barangay.
Mohulip unya ni Gabiana sa pagkakonsehal sa barangay mao ang asawa sa ilang kanhi kapitan nga si Nenita Alit.
Matud sa bag-ong kapitan nga ila nang nasabotan sa iyang mga kaubang opisyal sa barangay, nga si Nenita maoy mohulip kaniya pagkakonsehal.
Wala pa hinoon matino kung mosugot ba si Nenita sa maong tanyag kinsa padayon pa nga nagbangutan sa kalit nga kamatayon sa iyang bana.
Ang patay’ng lawas ni Alit anaa gihaya sa pinuy-anan niini ug wala pa matino kung kanus-a ihatod ngadto sa pahuwayang dayon.
Kini tungod kay giingong gipaabot pa sa pamilya ang laing anak sa kanhi kapitan nga tua manarbaho sa gawas sa nasud. – BANAT NEWS