Gipusil sa diskohan kritikal

CEBU - Kritikal ang kahimtang sa usa ka 19 anyos nga samdan sa ulo dihang gipusil sa wala hiilhing kriminal didto sa diskohan sa Sitio Lubo, barangay Dungga siyudad sa Danao kagahapon sa kaadlawon.

Ang biktima mao si Archie Pepito, 19, ulitawo, usa ka estambay nga taga Sitio Kulo, barangay Kahumay–humayan, Danao City.

Si SPO3 Quirino Vasquez sa Danao City Police mibutyag sa Banat News nga ang biktima diha sa gawas sa diskohan nga nakig-inom sa iyang mga higala dihang kalit lang kining giduol sa kriminal ug mipusil sa iyang ulo gamit ang wala pa matino nga kalibre sa armas de fuego.

Gihatod dayon kini ngadto sa Danao City District Hospital apan gibalhin kini sa tambalanan sa dakbayan sa Sugbo sa paningkamot nga masalbar pa kini.

Gituohan sa kapolisan nga ang maong pagpamusil may kalambigitan sa panagribal sa mga fraternity group sa mga batan-on sa maong lugar. – BANAT NEWS