CEBU - Si Interior and Local Government Undersecretary Lito Ruiz nga bana ni Kongresista Nerissa Soon-Ruiz miduso og aplikasyon sa Commission on Election – Lapulapu pagbalhin sa iyang residensiya sa barangay Basak, dakbayan sa Lapulapu.
Gikonpirmar ni Lapulapu election officer Ann Jeaneth Lamban ang pagduso ni Ruiz og “application for transfer registration records” gikan sa barangay Casili, Mandaue ngadto sa barangay Basak, Lapulapu.
Sa dihang nahinabi sa Banat News, si Ruiz nagkanayon nga nagpuyo na siya sa Lapulapu sukad 1978 ngadto sa 1983. Nawala siya sa Lapulapu sa dihang nanarbaho sa Estados Unidos ug nagminyo ni Kongresista Soon-Ruiz.
Matud niya nga aduna siyay balay sa Deca Homes Subdivision sa barangay Agus, apan gipalapad pa kini hinungdan nga nanimuyo una siya sa barangay Basak.
Gituohan nga si Ruiz modagan pagka-mayor sa Lapulapu. – BANAT NEWS