Rice nasakmit imbentaryohon

Gibantayan pag-ayo sa mga tinugyanan sa Bureau of Customs (BOC) ang mga nasakmit nilang sinakong bugas sulod sa 11 ka mga container van aron dili kini mangawagtang.

 Si ESS-CPD Commander Captain Isidro Estrera mibutyag sa Banat News  nga ila nalang dunganon ang pag-imbentaryo ug ang pag-inspeksyon sa maong mga bugas aron pagsiguro nga walay mawagtang niini.

Ang maong mga bugas gisakmit sa mga tinugyanan sa adwana niadtong miaging semana human moluwat og warrant of seizure and detention si Cebu Customs District Collector Ricardo Belmonte.

 Miingon si Estrera nga iya kining iturn-over dayon ngadto sa bodega sa National Food Authority (NFA) aron maluwas kini sa posibleng pagkawagtang gikan sa Cebu International Port (CIP).

 Matud pa niya nga kun ika-turn-over na kini ngadto sa NFA dunganon nalang ang pag-imbentaryo ug ang pag-inspection sa sulod sa 11 ka mga 20 footer van nga patambongan sa mga sakop sa Comnission on Audit (COA,) representante sa tag-iya sa maong mga bugas ug mga examiner sa BOC-Port of Cebu.

Kahinumduman nga nahiabot ang 17 ka mga container van niadtong Nobyembre 23 ning tuiga dinhi sa Sugbu gikan sa Cagayan de Oro nga gipanag-iya ni Mario Mabilog ug Marcos Amorin.

Apan dihang gisusi kini sa mga otoridad sa adwana wala makapakita ang maong mga tag-iya og mga dokumento bahin sa tukmang address ug permit to transport gikan sa NFA Cagayan de Oro.

Gumikan sa katahap nga kini pinayuhot milihok gilayon ang mga tinugyanan sa BOC ug gipaubos kini sa   alert order sa mga sakop sa Customs Police.