PDEA bansayon sa paggamit sa armas

Ipa-ubos sa pagbansay-bansay ang tanang kawani sa Philippine Drugs Enforcement Agency (PDEA) alang sa “firearm proficiency ug unarmed defense.”

Kini maoy gipahibalo ni Dangerous Drug Board (DDB) Undersecretary Clarence Paul Oaminal sa Banat News kinsa mitakda na og schedule alang sa maong training.

Ang maong pagbansay-bansay nahukman sa kadagkoan sa PDEA human ang usa sa ilang confidential agent nga si Bernabe Villanueva Española, 49, napusilan sa buko-buko niadtong Biyernes sa gabii didto sa Quezon Boulevard, sitio Bato-Carbon, barangay Ermita atol sa usa ka buy bust operation nga ilang gilusad.

Hinuon nasikop nila ang inahan ug anak nga sila si Lilia Entera ug ang anak niini nga si Sherwin, kinsa mga suspetsadong nabaniog na pag-ayo nga nagpadagan og negosyong ilegal nga drugas sa maong lugar.

Si Española anaa pa karon sa intensive care unit sa usa ka pribadong tambalanan ning dakbayan.

Ang maong PDEA agent naigo sa buko-buko sa bala sa armas nga wala pa hisayri ang kalibre sa dayon na nilang biya gikan sa Bato-Carbon dala ang ilang mga dinakpan.

Wala hisayri kun kinsay nakapusil kang Española, apan gituohan sa mga otoridad nga taga Bato-Carbon ra ang kriminal.

Si Oaminal nagkanayon nga didto niya ibase sa maong hitabo ang iyang lakang sa pagpaubos sa usa ka training sa mga PDEA agent.

Kini aron mabansay sila sa paggamit sa armas o kaha sa kaugalingon nilang pangamot nga manu -mano sa higayong makasugat silag away nga walay armasay.

Miingon si Oaminal nga ang maong pagbansay-bansay dili lamang para sa mga operatiba sa PDEA kundili lakip na usab kadtong anaa ra sa opisina magtrabaho.

Sa pagkakaron nagtinabangay ang PDEA ug ang DDB sa mga galastohan sa pagpatambal ni Español.

Sa samang higayon nagpasalamat usab siya kang konsehal Jack Jakosalem tungod kay mitabang usab kini sa pagpatambal ni Española ug milaum si Usec-Oaminal nga magpadayon ang City Hall sa ilang abag.

Iyang giklaro nga kabahin sa pasidungog ni Española wala pa nila kahisgoti tungod kay giuna nila ang talandugong kahimtang niini.