Batan-ong lalake giluba sa tiguwang

Kritikal ang kahimtang sa usa ka 27 anyos nga lalake dihang gidunggab kini sa 62 anyos nga lolo nga iyang silingan didto sa barangay Esperanza, lungsod sa Poro ,isla sa Camotes niadtong miaging gabii.

Ang biktima mao si Jomarie Gorgonio, 27 , ulitawo nga taga Esperanza, samtang ang suspek mao si Pepito Danasco Sr., 62 , minyo, nga silingan sa biktima.

Matud pa sa kapolisan nga ang biktima ug ang suspetsado nagkalalis ug dihang nahutdan sa katarungan ang suspetsado milanit kini sa iyang kutsilyo ug gihansakan ang biktima niini.

Ang biktima nga wala makabantay ug walay praktis bahin sa self defense nasabak sa sentro sa dughan ug gihatod dayon kini og dali ngadto sa Ricardo Maningo Memorial Hospital sa lungsod sa San Francsico.

Samtang ang suspek nga tiguwang buot untang mosibat apan wala siya makaikyas gikan sa abtik kaayong mga polis nga sila si PO2 Crisologo Belocura, PO1 Jeremias Geromo ug PO1 Benjie Garcia.

Dihang gisukit sa kapolisan, ang suspek nagkanayon nga naniguro lang siya sa kabalaka nga kon sinumbagayon dako kaayo siyang lupig tungod sa iyang edad.