Nagpakamatay pinaagi sa paghikog ang usa ka batan-ong lalake tungod kay gikauwaw niya ang sakit niyang sangla didto sa sitio Tayong , barangay Guimbuwangan , lungsod sa Barili niadtong miaging hapon.
Ang nagpakamatay mao si Adolfo Castro, 26 , ulitawo nga taga Tayong.
Matud ni SPO2 Luisito Gonzales sa Barili Police Station sa pakighinabi sa Banat News nga ang biktima patay nang na-abtan sa mga polis didto sa pinuy-anan niini nga naghikog pinaagi sa paghigot og nylon nga pisi sa liog niini samtang ang pikas tumoy gigaid sa bubongan sulod sa ilang balay.
Ang mga silingan ug inahan sa biktima nga si Estefania Castro, 64 , maoy nakadiskobre nga nagbitay na sulod sa balay ang biktima nga nagdiwalwal na ang dila nga wala nay kinabuhi.
Iyang gibutyag sa kapolisan nga gituohan niyang ang iyang anak naguol tungod sa iyang sakit nga sangla sulod sa dugay nang panahon .
Miingon ang inahan nga hapit na nila malibot ang nagkalainlaing meriko sa nasud apan wala gyud mosaler ang ilang orasyon.
Gani namatikdan sa inahan ang biktima nga sulod na sa pipila ka bulan magul-anon kaayo kini ug magpanagana na sa paglakaw -lakaw gawas sa ilang balay tungod sa ka-uwaw sa iyang sakit ilabina nga nasayran na kini sa iyang mga silingan ug higala.