Tanod nadat-ogan punoan sa buli, patay

CEBU - Patay ang usa ka barangay tanod nga nadat-ogan ang tibuok lawas niini sa punoan sa buli atol sa pagbunok sa kusog nga ulan alas 9:30 kagahapon sa buntag sa barangay Pit-os, ning dakbayan.

Si Agustin Villaban, 68, barangay tanod sa Pit-os, namatay tungod sa pagkadat-og sa punoan sa buli.

Si PO3 Jennifer Velasco sa Talamban Police Station miasoy sa Banat News nga atol sa pagbunok sa ulan, si Villaban naghawan sa kasagbutan luyo sa iyang balay.

Kalit lang midahili ang punoan sa buli tungod kay midahili ang yuta nga wala mabantayi ni Villaban.

Ang mga kabanay ug mga silingan na ang miibot sa lawas ni Villaban. Pag-abot sa kapolisan, giputos na kini og habol nga wala nay kinabuhi.

Si PO3 Velasco miingon nga naapil sa pagkaguba ang balay sa mga Villaban. – BANAT NEWS