UV Chorale concert sa St. Joseph, Biyernes

CEBU - Ang hugyaw ug multi-awarded nga UV Chorale mopahigayon og konsiyerto karong Biyernes,Disyembre 12 sa St. Joseph Church sa Mandaue City alas otso sa gabii.

Ang nahisgutang homecoming concert naumol gumikan sa malampuson nila nga pasundayag sa bag-ohay pa lang nga selebrasyon sa World Youth Day   nga gihimo didto sa Australia. Ang UV-chorale   nag-inusarang grupo nga mipasundayag gikan sa Pilipinas alang sa nahisgutang selebrasyon nga gisaksihan sa mga Obispo gikan sa nagkalain-laing nasud sa kalibutan.

Kung kahinumduman dinhi sa Sugbu, si Arsobispo Ricardo Cardinal Vidal mipaawit sa UV Chorale sa usa ka Santos nga Misa niadtong Nobiyembre 30 sa Cebu Metropolitan Cathedral alang sa ika-37 nga anibersaryo sa ordinasyon si Vidal.

Ang ticket sa konsiyerto mapalit sa University of Visayas Accounting Department ug sa Mandaue Academy.

Samtang sa Disyembre 13, Sabado, adunay laing konsiyerto sa maong grupo nga ipahigayon sa Audio-Visual Room sa UV-Main Campus. Ang ‘matinee’   himoon sa alas tres sa hapon samtang ang ‘gala’ mahitabo sa alas 6:30 sa gabii.

Awiton sa maong grupo ang pipila sa mga kanta nga ilang giawit didto sa Australia ug ang mga bag-o nila nga awit nga langkuban sa mga Christmas songs nga makapatandog sa mga manan-away. – BANAT NEWS