CEBU - Tulo ka mga tawo ang naangol apil na ang drayber atol sa panagbangga tali sa usa ka Isuzu Elf double cab ug trak de karga sa kurbadahon nga karsada sa barangay Laaw, lungsod sa Borbon kagahapon sa alas 8 sa buntag.
Ang drayber sa Isuzu kolor puti (GNA-304) naila nga si Henry Tiu, residente sa barangay Ilihan, Tabogon maayong pagkaangol. Apil sa naangol ang iyang sakay nga mao sila si Efren Español ug Junry Ochia.
Ang gikabangga niini mao ang trak de karga nga kolor pula (GXD-838) nga gimaneho ni Jose Bacalso, 31, taga Bugnay II, Labangon, dakbayan sa Sugbo.
Sumala pa sa imbestigasyon sa kapolisan sa Borbon, ang Isuzu Elf gikan sa amihanang Sugbu sa pagbiyahe niini paingon sa dakbayan sa Sugbu samtang ang trak de karga tikan sa siyudad sa Sugbu, sa dihang nahitabo ang panagbangga.
Matud sa kapolisan nga nawad-an og preno ang trak de karga nga mikawat sa pikas karsada hinungdan nga nasugat niini ang Isuzu Elf.
Ang mga nasamdan gitabang sa mga residente sa maong lugar ug gidala sa Chong Hua Hospital. – BANAT NEWS