Pan de sal burot na

CEBU - Ang Cebu Bakery Association Inc. (CEBA) andam nang mopaburot sa ilang pan de sal ug uban pang klase sa pan karong mibahar na ang presyo sa harina.

Matud pa ni Christopher Ebisa, ang presidente sa CEBA nga gawas sa pagbahar sa presyo sa harina, mi-rollback usab ang presyo sa mga produkto sa petrolyo nga wala nay igong katarungan nga dili nila padak-an ang ilang mga baligya.

Miingon siya nga lahi ang mga panaderiya kun mopabarato sa presyo sa ilang mga baligya, sanglit dili kantidad ang ilang i-rollback kundili ang gibug-aton ug gidak-on niini.

Matud ni Ebisa nga nagpasalamat sila kang President Gloria Macapagal Arroyo sanglit pinaagi sa Executive Order Numero 765 nga iya nang giluwatan nga nagtangtang sa dagkong buhis sa mga imported nga harina nga gikan sa Australia ug Amerika.

Matud pa niya nga mokabat sa 7 porsiyento ang natibhang sa presyo sa mga imported nga harina gikan sa Australia ug Amerika, ug 5 porsiyento usab ang natibhang gikan sa Southeast Asia. – BANAT NEWS