Amang gipamabdosan sa amahan

CEBU - Pormal na nga gipasaka sa korte ang kasong pagpanglugos batok sa usa ka amahan nga niunay og lugos sa iyang menor de edad niyang anak nga amang.

 Si Talisay City Prosecutor Marcial Rubia nagkanayon nga nakakita siya og igong basehanan nga pasakaan og kasong pagpanglugos ang suspek (ngalan gipugngan sa Banat News aron matago ang pagkatawo sa biktima) ngadto sa korte human nasuta sa medical certificate nga ang 15-anyos niyang amang nga anak nagmabdus na.

 Pinaagi sa eksperto sa sign language, nahibaw-an nga ang biktima gisugdan sa paglugos niadto pang bulan sa Hulyo ning tuiga.

 Ang piskalya wala nirekomendar og piyansa alang sa temporaryong kagawasan ni Caballero.

 Samtang sa laing kasong pagpanglugos nga kadugo, usa ka 19-anyos nga dalagang angkan ang giunay usab og lugos sa iyang 23-anyos nga uyoan diha sa usa ka bukirong barangay sa lungsod sa Argao.

Matud pa sa biktima, niadtong bulan sa Nobiyembre sa niaging tuig, siya ug ang iyang anak maoy nahibilin sa ilang panimalay kay may lakaw man ang iyang iyaan.

Pasado ala 1:00 sa kaadlawon gikamang siya sa iyang uyuan ug nakuha gyud ang iyang pagkababaye niini pinaagi sa pagpanghulga.

 Ang maong pagpanglugos nausban pa makaduha ka higayon sa bulan sa Disyembre sa niaging tuig ug bulan sa Enero ning tuiga dihang gipakuyog siya niini pagtumod og abot sa bukid dinhi sa siyudad sa Sugbu.

 Ang biktima bisan paman sa hulga ug kalisod sa pagpuyo desididong mosang-at og sumbong batok sa suspek aron lamang mahatagan og hustisya ang iyang nadangatan. – BANAT NEWS