2 trucks nagsungag 3 angol

CEBU - Duha ka truck ang nasungag diha sa highway sa barangay Laaw sa lungsod sa Borbon sa miaging adlaw sa alas otso kagahapon sa buntag ug parehong nangabalitok sa kalsada human sa aksidente.

Ang drayber sa maong ten-wheeler truck nga dunay plate no. GND-838 mao si Jose Torres, 31, minyo ug lumolupyo sa Labangon ning dakbayan miliko diha sa may kurbadahon nga dalan sa maong barangay.

Wala makabantay si Torres sa kasugat nga Isuzu Elf nga may plakang no. GNA-304 nga gimaneho sa usa ka negosyanteng si Henry Tiu ug mga kaubang sila si Efren Español ug Junrey Otchea nga pulos taga barangay Ilihan sa lungsod sa Tabogon.

Sa gihimong imbestigasyon sa kapolisan ang sakyanan ni Tiu padulong sa dakbayan sa Sugbu aron mangompra samtang ang 10-wheeler truck gikan sa habagatan.

Matud pa sa kapolisan gumikan sa kadako sa maong trak nga misungag sa Isuzu Elf nadaro og balik paatras ang naulahi hangtud nga nadarok sa pikas dalan samtang ang 10-wheeler nahayang sa may kanal.

Ang mga biktima daling gidala ngadto sa Chong Hua Hospital tungod sa mga samad nga naangkon.

Matud pa ni PO2 Rey Soson nga lubakon ang maong dapit ug daghan na ang nadisgrasya niining dapita ilabi na kadtong mga driver nga kusog magpadagan sa ilang mga sakyanan.

Kasamtangan giimbistigar sa kapolisan sa Borbon si Torres arun sutaon og unsay hinungdan sa maong panghitabo. – BANAT NEWS