Sex sa KTV bar gironda

CEBU - Gironda sa kapolisan sa dakbayan sa Lapulapu ang usa ka KTV bar tungod sa report nga ang ilang mga babayeng dancers o guest relations officers (GRO) pwedeng makighilawas sa mga makauyon nga kustomer ug sulod mismo sa ilang bar kini himuon.

Ang girondang bar mao ang Brillant Bar diha sa Pusok dakbayan sa Lapulapu sa milabay’ng gabii nga miresulta sa pagkasakop sa floor manager nga si Yolanda Ala, 41, residente sa Humayhumay, Gun-ob dakbayan sa Lapulapu.

Gidakop usab ang usa sa iyang mga babayeng sakop nga usa ka 26-anyos (ngan gipugngan) taga barangay Alang-alang dakbayan sa Mandaue kinsa daling giposasan sa iya mismong kahilawas nga usa diay ka polis.

Gawas sa duha gisikop usab ang pito pa ka mga babayeng giingong walay mga sapot   samtang nanayaw sa entablado.

Ang operasyon gipanguluhan ni Sr.Insp. Rene Catamora giingong kanunay nang nakadawat og mga report kabahin sa pagpakighilawas sa mga babaye ug parokyano diha sulod sa mga lawak sa underground sa maong bar.

Subay sa maong report, usa ka operasyon ang ilang gihulma ug gamit ang usa ka polis nga nagpailawom sa Field Training Program ang ilang gibahug ngadto sa maong bar isip decoy.

Wala hinuon mapakyas ang operasyon sanglit daling nakakuha og pares (ang 26-anyos) ang maong polis bugti sa P1,000 nga iyang gibayad ngadto sa maong babaye.

Human makumpirmar ang hilas ug malaw-ay nga operasyon sa maong bar daling misulong ang mga polis diha sa gawas hinungdan sa ilang pagkasikop.

 Nasayran nga diha diay ang gitumbok nga tag-iya sa maong bar nga giilang si Jason Colina kinsa daling mieskapo agi sa luyong bahin sa maong edipisyo. 

Matud pa ni Catamora nga lakip si Colina sa ilang pasakaan og kasong kalapasan sa Art. 341 sa Revise Penal Code, samtang ang pito ka mga dancers pasakaan usab og kasong bagransiya  ug kasamtangang nangatanggong sa detention cell sa kapolisan sa dakbayan sa Lapulapu. – BANAT NEWS