PDEA asset gipusil

CEBU - Nabuslot ang buko-buko sa usa ka confidential agent sa Philippine Drugs Enforcement Agency (PDEA-7) human pusila atol sa buy bust operation mga alas 9:00 niadtong Biyernes sa gabii diha sa may Quezon Blvd. sitio Bato, Carbon, barangay Ermita ning dakbayan.

Ang nalandig sa Cebu City Medical Center (CCMC) giila sa kapulisan nga si Bernabe Villanueva Española, 46, PDEA-7 confidential agent ug lumad nga taga Buenavista, Bohol.

Base sa imbestigasyon nila ni SPO2 Rey Cuyos ug mga kaubanan sa Homicide Section sa Cebu City Police Office si Intelligence Officer 4 Julius Navales, chief of Plans and Operations sa PDEA-7 nga siya maoy nag-lead sa ilang team sa pagpahigayon sa maong buy-bust operation.

Bisan paman niini milampos sila pagsikop sa manag-inahang subject sa ilang operasyon nga sila si Ma. Lilia Estera ug Sherwin Estera diin nakuhaan nila’g ubay-ubay nga shabu.

Apan matud pa ni IO4 Navales nga samtang mopadulong na unta sila sa pagbiya sa lugar usa sa ilang agent nga si Española ang kalit lang gipusil hinungdan nga naigo ang buko-buko niini.

Nakahimo pa unta sila’g return fire ug gigukod ang wala mailhing suspetsado apan wala na gyud nila kini maabti ug nakaikyas.

Samtang ang biktima dali usab nilang gidala sa tambalanan alang na sa dinaliang pagpatambal sa samad niini, ang mga ahente sa PDEA-7 nagtuo nga mga kaubanan ra sa ilang dinakpan nga tigpayuhot og drugas ang suspetsadong namusil. – BANAT NEWS