Military exercise gihangop

Gihangop sa mga lokal nga opisyal sa lungsod sa Argao ang gipahigayong “military exercise pagsisikap 2008" sa Naval Forces Central kon NAVFORCEN didto sa Sitio Looc, Brgy. Poblacion lungsod sa Argao kagahapon sa buntag.

Ang maong bansaybansay, personal nga gisaksihan ni Mayor Edcel Galeos sa Argao, Kapitan Felix Boltiar sa barangay Poblacion, NAVFORCEN Commander, Capt. Honorio Robert Balanon Jr. ug ni CENTCOM Commander Maj. Gen. Pedro Ike Inserto.

Sa nahisgutang ehersisyo gipakita sa mga sakop sa Philippine Navy ug Philippine Marines ang ilang katakos sa pagpanalipod sa nasud batok sa mga terorista ug pagpakgang sa insurhensiya .

Matud pa ni Mayor Galeos nga wala siya’y nabati nga reklamo sa mga molupyo sa dapit nga gipahigayonan sa maong bansaybansay ug gani mapasalamaton ang mga katawhan sa Sitio Looc gumikan sa mga sports equipment ug pansayan nga gitukod sa mga sakop sa NAVFORCEN lakip na ang pagpanghatag sa mga garbage bins.

Si Kapitan Balanon nagkanayon nga ang maong kalihukan kanunay nilang gihimo matag tuig alang sa ilang pagpalambo sa ilang mga taktika sa pagsumpo sa insurhensiya nga naghamok karon sa nasud ug kanunay’ng andam ang ilang mga barko ug kahimanan alang sa gubat.

 Subling gipasabot ni Balanon nga ang ilang gipahigayong exercise sa lungsod sa Argao walay kalambigitan sa isyu bahin sa gikagubtang oil exploration sa kadagatan sa lungsod ug ang panghulga sa mga cause oriented groups batok sa gobiyerno.