Davide midepensa sa FLI deal

Gipanalipdan ni Cebu City Acting Vice Mayor Hilario Davide III ang disisyon sa kagamhanan sa dakbayan pagdawat sa proposal sa Filinvest Land Incorporated (FLI).

Kini may kalabotan sa pagpalit sa FLI og napulo ka ektaryang luna sa South Road Properties ug paggamit sa laing 40 ka ektarya pinaagi sa pagpakig-joint venture sa siyudad.

Ang mga opisyal sa Kapitolyo mikwestyon sa giingong “2 in 1” deal nga nasabotan sa FLI ug sa City government tungod kay giingong managlahi ang duha ka transaksyon.

Apan matud ni Davide nga walay irigularidad ang pagdawat sa siyudad sa tanyag sa FLI ug dili usab mabuwag ang proposal niini.

Midugang ang acting mayor nga kung dunay gusto nga mo-challenge sa proposal sa Filinvest, kini kinahanglang motuman sa nalatid sa joint venture ordinance sa dakbayan.

Nasayran nga ang kagamhanan sa lalawigan maoy kusganong mipadayag og interes sa pagpuhal sa proposal sa Filinvest.

Gitataw hinuon ni Davide nga dili makadiktar ang Kapitolyo kung unsay nakita sa mga opisyal sa siyudad nga makahatag og kaayohan sa mga Sugbuanon.

Taliwala niini niingon si Sepulveda nga sila mangita gihapon ug paagi nga makasalmot sa bidding ug maoy makapalit sa ibaligyang luna ngadto sa FLI. (Elly Bolonos ug Rey Pasaporte)