Mga babaye gipasidan-an

CEBU - Higpit nga gipasidan-an sa City Social Welfare and Development Office (CSWDO) sa dakbayan sa Mandaue ang mga batan-ong kababayen-an sa paglikay sa mga tawo nga modani kanila nga pasudlon og trabaho sa mga dapit nga gawas sa Sugbo.

Ang maong pasidaan gihimo aron nga dili na masubli ang nahitabo sa 15 ka mga batan-ong babaye sa dakbayan nga gi-hire og trabaho sa dakbayan sa Iloilo apan gidala sa casa ug gilawog sa mga kustomer nga mga lalaki.

Si Violita Cabada nga maoy City Social Welfare Officer sa dakbayan sa Mandaue mibutyag sa Banat News nga siyam sa 15 ka mga babaye nga gibiktima sa mga illegal recruiter pulos taga dakbayan sa Mandaue.

Dugang pa niya nga suwerte na lang kay nakaeskapo ang usa kanila nga maoy nakapasikop sa tulo ka mga tawo nga taga zone Agbate sa barangay Paknaan sa maong dakbayan ug nabalhog na karon sa bilanggoan.

Ang maong grupo naluwas pinaagi sa kapolisan sa Iloilo nga mipahigayon og kampanya nga gitawag nga Oplan Adam’s Apple nga giumol ni Mayor Jerry Treñas sa maong dakbayan.

Matud pa ni Cabada nga si Mayor Jonas Cortes nakiglambigit na karon sa kagamhanan sa dakbayan sa Iloilo aron nga makauli sa Mandaue ang maong mga biktima.    (BANAT NEWS)