Security sa mall gisaway

CEBU - Gikunis-kunis sa pagsaway sa tag-iya sa Golden Treasures Best of Jewelry ang mga tagdumala sa Mango Square Management ingon man Misda Security Agency tungod sa pagpabaya sa ilang seguridad.

Kini maoy gipadayag ni Bebeth Young human giyano lang og sakiyo sa pito ka mga tulisan ang ilang mga mahalong alahas nga mokabat sa kapin sa usa ka milyon niadtong Martes sa hapon.

Matud pa ni Young nga nagmika lang ang security guard sa maong mall ug dili tinood nga dunay igong mga security nga gibutang samtang dili usab tinuod nga mag-roving kini diha sa area.

Samtang gibutyag niini nga tinuod usab nga mga paltik ang mga armas nga gigamit sa security agency gumikan kay sila mismo nakakita niini gani mag usa pa nila ka gwardiyang usa ray bala.

Ang maong mall pabiling nangangkong paigo ang ilang seguridad, usa ka pangangkong gisaway ni Young kinsa nag-abang og pwesto diha sa 3rd Floor tungod kay matud pa niya kung tinuod pa ang pangangkon sa mall di unta makayano og sulod ang mga armadong tulisan.

Ang mga tulisan nagdala pa og awto sa taas ug adto pa mi-parking, duha ka gwardiya ang nangangkong pulos nakakita apan pulos walay nahimo kundili pagtago.

Nagmahay usab siya sa kapulisan gumikan kay miabot pa’g 20 ngadto sa 25 minutos una pa naabot sa gihitaboan dihang nakapindot sila sa alarm system nga Mobile Alarm Response System (MARS) nga konektado sa City Hall, sukwahi sa mga nanggawas nga reports nga wala silay security system. (BANAT NEWS)