Kaalyadong Radaza mitalikod niya

CEBU - Duha ka suod ni Lapulapu City Mayor Arturo Radaza mideklarar nga mag-independente na sa ilang estado sa konseho sa dakbayan sa Lapulapu ug sa Association of Barangay Captains kon ABC.

Unang mipadayag sa iyang pagkaindependente mao si Lapulapu City Councilor Junard "Ahong" Chan diin atol sa ilang regular session sa milabay’ng Miyerkules sa hapon ang konseho sa dakbayan sa Lapulapu pinaagi ni Konsehal Damian Gomez mipadayag pinaagi sa usa ka resolution sa pagsusi kung anaa pa ba ang pagsalig ug suporta sa konseho kang Radaza.

Mitumaw nga 11 ka konsehal ang padayong nisuporta kang Radaza gawas kang Chan kinsa mi-abstain ug mideklarar nga siya usa na ka independente.

Si Chan sa pakighinabi sa Banat News mipadayag nga ang iyang pag-abstain ug pagka-independente karon nagsumikad sa iyang pagtahod ni kanhi senador Sonny Osmeña nga maoy ilang amahan sa partidong "Alayon" kinsa wala na mosuporta kang Radaza.

Kagahapon sa hapon atol sa regular meeting sa ABC, si ABC President Leo Mercado nakugang usab sa mga pamahayag ni Canjulao barangay kapitan Rufo Bering sa pagdeklarar niini nga independente na usab siya ug wala na ni Radaza.

Sa pagkakaron 29 ka kapitan ang padayong misuporta ni Radaza gawas lang kang Bering kinsa giingong misimpatiya kang Chan isip suod nga managhigala.

Si Radaza pinaagi sa secretary to the mayor nga si Rolando Duero miangkong nasurpresa apan misalig nga magkauliay ra sila og balik sa mayor. (BANAT NEWS)