ATM card sa mga kawani sa CH gikaon sa ATM machine sa Landbank

CEBU - Ubay-ubay nga mga regular employees sa Cebu City Hall ang nangreklamo tungod kay ang ilang mga ATM Card sa Land Bank gikaon sa ATM machine atol sa ilang pag-withdraw.

Walay kalibutan ang nangreklamong mga empleyado nga gi-deactivate na sa Land Bank of the Philippines ang ilang mga ATM Card sugod niadtong Martes sa gabii.

Kini subay sa proseso pag-covert niini ngadto na sa Electronic kon E-Card nga magsilbi usab unya nga Identification Card sa mga kawani.

Mahibalik ra hinoon sa hingtungdang mga empleyado ang ilang mga ATM Card human ireklamo ngadto sa nahisgutang bangko.

Subay niini gipahimangnoan sa City Treasurer’s Office ang mga regular employees nga over the counter lang una ang pag-withdraw og kwarta sa Land Bank.

Kini aron dili malangay sa ilang himoon nga transaksyon tungod kay siguradong kan-on sa makina ang mga ATM Card niini.

Gipadayag hinoon sa Assistant City Treasurer for Administration nga si Emma Villarete nga mahatag na ngadto sa mga kawani ang ilang E-Card sa sunod semana.

Kini sigon usab sa gipasalig sa Land Bank ngadto kanila, tungod kay nagpadayon pa ang pag-verify niini sa ATM Card sa 1,300 ka regular employees.

Matud ni Villarete nga ang mga representante sa Land Bank didto sa kaulohan gitakdang mobisita sa City Hall sunod semana dala na ang E-Card sa hingtungdang mga kawani.

Gitinguha sa kagamhanan sa dakbayan nga mailisan og E-Card ang mga ATM Card sa mga empleyado, aron kini dili na maprenda ngadto sa mga loan shark.

Kini tungod kay ang E-Card gikinahanglang kanunay nga dalhon sa mga empleyado tungod kay kini maoy magsilbi usab nilang City Hall ID.

Nasayran nga kadtong mga casual, contractual ug job order employees sa City Hall, unya pa sa sunod tuig ma-convert ang ilang ATM Card ngadto sa E-Card. (BANAT NEWS)