NBI agent nga nangulata sa mall gisilotan

CEBU - Gipaubos ni NBI regional director Medardo Delimos sa ‘camp restriction’ ang iyang ahente nga giingon nga nangulata didto sa Ayala Mall niadtong nakalabay nga adlaw.

 Sumala pa ni Delimos nga iya nang gi-confine sa headquarter si Agent Florento Guwiran samtang nagpadayon pa ang imbestigasyon sa kaso nga giatubang. Nagpasabut kini nga dili makakuyog sa bisan unsang operasyon si Guwiran.

 "Si Guwiran was admonished very strongly. Gisultihan nato siya nga mao ni ang consequences sa iyang action so he could not drag the name of the whole institution," matud pa sa NBI director.

 Giklaro ni Delimos nga walay labot ang NBI sa gisudlan nga kagubot ni Guwiran tungod kay iya kining "personal concern". Gani niadtong higayona walay operasyon ang NBI ug tungod niini dili sila manghilabut sa kaso sa naasoy nga ahente.

 Matud pa ni Delimos nga iyang gi-request ang Mabolo Police Station nga tagaan sila sa kopya sa resulta sa ilang imbistigasyon aron makahimo   usab sila og administrative action batok ni Guwiran kun gikinahanglanon.

 Gipahibalo hinuon ni Delimos nga ang security guard sa Ayala mi-coordinate kanila ug niingon nga natagak ang armas ni Guwiran hinungdan nga ilang susihon pag-ayo ang insidente. – BANAT NEWS