14 ka container bugas, asukar ipa-WSD

CEBU - Girekomendar sa Customs Police Division (CPD) sa Port of Cebu nga luwatan og warrant of seizure and detention (WSD) ang 14 ka mga 20 footer container vans nga nasuta nga misdeclared ang mga sulod niini ug mga imported nga bugas ug asukal nga gikan sa Cagayan de Oro City.

Base sa gihimong spot inspection sa mga sakop sa Enforcement and Security Service CPD sa mga container vans ang duha ka 20 footer vans adunay sulod nga mga sinakong asukar ug dili bugas sigon sa deklarasyon sa mga consignee niini nga sila ni Mario Mabilog ug Marcos Amorin.

Gumikan niini si Capt. Isidro Estrera, ang district commander sa Customs Police mirekomendar ngadto ni Cebu Customs District Collector Ricardo Belmonte nga luwatan kini og WSD aron ang ubang mga container vans   masusi usab kun susama ba sa tulo ka vans nga ilang gihimoan og spot checking diin nasuta nga misdeclared ang mga sulod niini.

Kahinumduman nga sa milabay’ng Nobiyembre 23, 2008 miabot ang 17 ka mga container vans gikan sa Cagayan de Oro ug tulo ka vans ang nakagawas sa CIP samtang ang 14 ka 20 footer vans nagpabilin human nga gialerto kini sa mga sakop sa ESS-CPD.

Nasuta sa deklarasyon nga pulos kini mga sinakong bugas apan usa niini nagpakita nga imported ang maong mga bugas nga gikan sa Thailand.

Atol sa inspeksiyon nga gihimo nila ni Capt. Estrera ug Lt. Reynaldo Lascota, ang mga consignee misumiter og kopya sa permit to transport gikan sa NFA Misamis Oriental Provincial Office diin pinetsahan og Nobiyembre 25 ug 26, 2008 apan ang maong kargamento miabot dinhi sa Sugbu luwan sa M/V Princess of the South niadtong Nobiyembre 23 ning tuiga. – BANAT NEWS