CEBU - Usa ka puya nga gisulod og garapon napalgan sa nagkawot og safety tank didto sa Sitio Ibabao, Barangay Mambaling ning dakbayan sa Sugbu sa miaging buntag.
Si Diosdado Puno, 45, nga molupyo sa maong lugar uban sa iyang mga silingan nga sila si Roserio Jonas, Felimon Amandoron ug Nara Boscato nagkawot og lungag sa likod sa ilang balay dihang nakubkoban nila ang usa ka garapon nga gisudlan sa usa ka puya nga dili na maklaro ang pagkatawo, babaye o lalake ba.
Dihang ila kining gisil-ing, naklaro gyud nila ang usa ka puya nga kompleto na sa tanang parte sa lawas apan hapit na madugta.
Gumikan niini gidala dayon nila kini ngadto sa kapolisan kinsa mimando kanila paghatod sa maong garapon ngadto sa Saint Francis Funeral Homes. – BANAT NEWS