Makareport bahin sa basura may kuwarta

CEBU - Makadawat og ganting salapi si bisan kinsang molupyo sa barangay Umapad, dakbayan sa Mandaue nga makasumbong ngadto sa mga otoridad sa ngalan sa mga tawo nga magpataka og labay sa ilang basura.

Kini ang gitawag nga “sa basura may pera”, matud pa ni Kapitan Zaldy Lumapas sa barangay Umapad.

Miingon si Lumapas nga epektibo kaayo ang iyang gihimo sanglit misangpot kini sa pagkasikop sa mga tawo nga nagpataka og labay sa ilang basura ug nagkagulkol na karon sa prisohan sa Mandaue City uban sa kasong gipasaka batok kanila.

Unya kadtong mga tawong maoy nakapadakop sa maong mga malapason gihatagan usab sa primyo nga gitakda sa kagamhanan kanila nga wala kaayo mapiho ni Lumapas ang kantidad nga gigahin sa kagamhanan sa dakbayan alang niini.

Apan sa maong kampanya dili lamang kay mga tigpataka og labay sa basura ang dakpon ug pasakaag kaso kundi bisan kadtong magpatuyang og suwatsuwat sa mga pader, ug mga bongbong sa kabalayan pinaagi sa paggamit og pintora.

Gani daghan nang mga batan-ong magsuroy-suroy sa panahon nga lawom nang gabii nga bangog na sa paggamit sa ilegal nga drugas ug magpataka og sulat sa koral o mga bongbong sa kabalayan pinaagi sa gigamit nga pintal.

Si Kapitan Lumapas miingon nga ang higpit nga pagdili sa pagpataka og labay sa basura ilang gibase sa gipatuman nga balaod ubos sa Republic Act 9003 kon solid waste managemet act of 2001.

Dugang niyang gibasehan mao ang City Ordinance 10-2006 nga nagpahamtang og multa nga P500 alang niadtong masakpan nga magpataka og labay sa basura sa daplin sa dalan, bakanteng luna ug bandalismo nga sagad pagahimoon sa mga batan-ong nagumon na sa paggamit sa ginadiling drugas. – BANAT NEWS