CEBU - Gipahibawo karon sa Cebu City Traffic Group ug sa City Traffic Operations and Management (Citom) nga sagad masinati sa siyudad ang panaghuot sa mga sakyanan.
Kini tungod usab sa ubay-ubay nga mga kalihokan sa dakbayan ilabi na panahon sa kagabhion nga moresulta sa pagsira sa pipila ka mga dalan.
Partikular nga ginganlan sa Traffic Group ug Citom mao ang usa ka buwan nga Kasadya sa Downtown Colon.
Tungod sa maong kalihokan sirad-an ang nahisgotang dalan gikan sa alas 7:00 sa gabii hangtod sa alas 3:00 sa kaadlawon hangtod sa Desyembre 31.
Dugang niini, ang matag gabii nga kalingawan diha sa Fuente Osmena Rotunda subay sa paglusad sa Pasko sa Sugbu giingong nakamugna usab ug traffic congestion.
Kini tungod sa mga tawo nga molabang sa dalan paingon sa rotunda nga motan-aw sa linawas nga mga pasundayag.
Gipaabot usab sa Traffic Group ug Citom nga maghuot sa mga sakyanan ang kadalanan nga paingon sa nagkadaiyang mga shopping malls.
Sa pikas bahin ilusad na usab karong adlawa ang ikatulo na ka tuig nga Pasko sa Carbon nga gipasiugdahan sa United Multi-Sectoral Council of Cebu City (UMC-4).
Subay niini gitakda usab nga sirad-an ang dalan Manalili ug Plaridel gikan sa Lincoln Street ngadto na sa J. Leyson Street paingon sa Carbon area.
Hinoon ang maong mga dalan unya pa sa Desyembre 26 ngadto sa Desyembre 30 sirad-an tungod sa nagkadaiyang matang sa prutas nga ipamaligya.
Ang Traffic Group ug Citom padayong mipahimangno sa mga motorista nga patas-an ang pasinsya ug mosunod sa mga traffic sign nga ipakatap sa kadalanan.
Kini aron dili makahatag og kahasol sa ubang mga road user nga nagdali paingon sa ilang tagsa-tagsa ka destinasyon. – BANAT NEWS