CEBU - Mihiwasa ug mireklamo an g mga mayor sa nagkalainlaing lungsod sa lalawigan gumikan sa kadaginuton na kaayo sa bugas sa gobyerno nga gisuplay ngadto sa ilang lungsod.
Atol sa miting sa Provincial Development Council kagahapon didto sa Capitol Social Hall, gisumbong sa mga mayor kang Governor Gwen Garcia nga gawas nga dyutay mahal pa gyud ang suplay nga bugas gikan sa National Food Authoroity (NFA) nga ihatod sa ilang lungsod.
Si Mayor Ricky Ramirez sa Medillen nagkanayon maoy mihiwasa nga mipalanog sa iyang reklamo gumikan kay P25 matag kilo ang NFA rice nga gipanghatod ngadto sa ilang lungsod ,samtang ang tua sa Tindahan Natin(TN) tag P18 ra ang kilo.
Apan si Regional Director Danilo Bunabon sa NFA 7 kinsa naminaw sa mga mulo sa mga mayor dali kaayong nakatubag dihang gisukit siya sa gobernador.
Matud pa ni Bunabon nga nihit kaayo ang suplay karon sa bugas gikan sa gawas sa nasud maoy hinungdan nga ginagmay nalang ang ilang ikahatod ngadto sa mga lungsod.
Bahin usab sa managlahing prisyo nga ilang gihatag sa bugas sa NFA ngadto sa lungsod ug sa TN, ki ni nagumikan kay mas minus og kalidad ang bugas nga ilang gihatag ngadto sa TN, matud pa ni Bunabon. – BANAT NEWS