Gipusil sa ka-tong-its kritikal

CEBU - Kritikal ang kahimtang sa usa ka 33-anyos nga lalake human kini pusila sa iyang kasugal og tong-its niadtong Lunes sa gabii didto sa barangay Tungkop, lungsod sa Minglanilla.

 Ang biktima giila sa mga polis nga si Sonny Tanola, usa ka manindahay og siyakoy ug nagpuyo sa maong lugar.

Samtang ang suspek giila lang nga Dragon o Tambok, nga walay tinong adres.

Ang biktima nasabak sa mga bala sa nagkadaiyang bahin sa lawas ug gihatod dayon ngadto sa Vicente Sotto Memorial Medical Center sa dakbayan sa Sugbu samtang ang suspetsado padayon pang gipangita sa mga kapolisan sa lungsod.

Si PO2 Christopher Castro, duty desk officer sa Minglanilla Police Station mibutyag sa Banat News nga si Tanola ug ang suspek nagduwa og tong-its apan nagkalalis kini tungod kay wala magkasinabot sa ilang gipustang kwarta.

Human sa maong lalis nagkasinumbagay ang duha apan dihang gilupig ang suspek milanit kini sa gitangkil nga armas de fuego nga wala pa hisayri ang kalibre ug gipusil dayon ang biktima.

Ang mga polis nalang sa lungsod maoy misakwat kang Tanola kay gipasagdan lang kini sa mga tawo nga nagbuy-od sa yuta nga naligo sa iyang dugo.

Ang kapolisan nakapunit og usa ka Batangas knife diha sa lugar nga nahitaboan apan walay nakitang samad dinunggaban ang lawas ni Tanola. – BANAT NEWS