Ahente sa NBI nanghasi gipriso

CEBU - Nabalhog sa Mabolo Police Station ang duha ka mga hubog nga ahente sa National Bureau of Investigation (NBI-7) human makasugat og karambola kagahapon sa alas 5:00 sa kadlawon didto sa Terraces Lemon Grass sa Ayala Center Cebu.

Ang nasikop gumikan sa kasong “alarm and scandal” giila sa kapolisan nga sila si Florante Gaoiran, 37, Special Investigator sa NBI-7, ug ang kauban niining si Baladya Arbon, usa ka asset sa NBI-7.

Samtang ang ilang kontra mao sila si Real Calinawan, 26, Odrep Alatraca, 25, Jimboy Villanueva, 25 nga pulos taga Tisa, Labangon ning dakbayan.

Si PO1 Ruben Perater sa Mabolo Police Station mibutyag sa Banat News nga ang duha ka mga ahente sa NBI-7 nag-inom didto sa Lemon Grass sa luyong lingkoranan nila ni Calinawan.

Matud pa ni SPO1 Perater nga si Gaoiran gikatahong makaduha ka higayong mituyo sa paghagbong sa P50 nga kuwarta sa sawog nga gipapunit lang usab dayon sa waiter sa nahisgutang imnanan.

Hinungdan nga si Calinawan kinsa mibatig kaluoy sa waiter, mibadlong kang Gaoiran.

Apan matud pa nasuko si Gaoiran ug giingong nanghagit uban sa paglanit sa iyang .45 kalibreng pistola dayong singhag nga nagkanayon “unsa palag ka?”

Didto magsugod ang binugnoay nila ni Gaoiran ug sa grupo ni Calinawan nga nakapalisang pag-ayo sa mga katawhan sulod sa maong imnanan hangtod nga nailog sa naulahi ang armas ni Gaoiran.

Didto milihok usab dayon ang security guard nga si Ellan Alcantara sakop sa Cherubim Security Agency kinsa daling mikuha sa armas ni Gaoiran ug gidala ang duha ka grupo ngadto sa Mabolo Police Station.

Apan kagahapon sa alas 3:35 sa hapon gibuhi-an ang duha ka mga ahente sa NBI-7 human magkasabot ug ang grupo nila ni Calinawan.

Apan mihuboy ang wait ug agtang ni Gaoiran kay nasabak kini sa mga kumo ni Calinawan ug mga kauban.

Gawas nga nabun-og pa, nakabayad pa og multa si Gaoiran nga balig P500 gumikan sa kalapasan niini sa balaod bahin sa pagkalasbag sa ilimnong makahubog diha sa publikong lugar.

Ang mga nakasaksi nagkanayon nga maayo unta to kun gibinlan nalang og gamay nga kinabuhi sa mga kaaway si Gaoiran aron motagam kay mao kini pago sa mga otoridad sa balaod nga abusado. – BANAT NEWS