Rollback sa plete mahibaw-an karon

CEBU - Mahibaw-an na karong adlawa kun pila ang dugang rollback sa pletihan nga aprobahan atol sa public hearing nga gipatawag sa Land Transportation Franchising and Regulatory Board (LTFRB) didto sa kaulohan taliwala usab niining sunod sunod nga pagpakunhod sa presyo sa mga produktong petrolyo.

Gipasalig hinuon ni LTFRB-7 director Romulo Bernardez sa dihang nahinabi sa Banat News nga makapaabot ang publiko og dugang rollback sa pletihan human sa maong public hearing apan nagdumili lang siya paghatag kun pila gyud ang mahatag alang dinhi sa Central Visayas aron paglikay nga ma-“preempt” ang ipakanaog unya nga desisyon sa board.

Si Bernardez nga gitakdang motambong sa maong public hearing mipadayag nga iyang i-presentar atol sa public hearing ang resulta sa iyang pagpakighinabi ngadto sa mga transport group dinhi sa Sugbo sama sa Nagkahiusang Drayber sa Sugbo (NADSU), Citrasco ug uban pa nga uyon na kini nga pun-an og 50 sentimos aron mahimong piso ang rollback sa pletihan ug karon nga mikunhod na ang presyo sa lana ubos sa P40 ang litro.

Nunot niini gipasalig ni Bernardez nga segurado na nga mopagawas og desisyon ang board sa LTFRB nga magtangtang sa P10 nga add on rate sa taxi tungod usab niining pagkunhod og maayo sa presyo sa LPG nga sagad maoy gigamit sa mga taxi unit dinhi sa Sugbo ug ubang bahin sa nasud.

Si LTFRB chairman Thompson Lantion maoy mo-preside sa maong public hearing kauban ang mga representante gikan sa National Economic Development Authority (NEDA) ug Office of the Solicitor general.

Atol sa unang tigum sa LTFRB sa milabay’ng bulan gi-aprobahan niini ang pagpatuman sa 50 sentimos nga provisional fare reduction pending sa petisyon nga nangayo og P2 nga rollback sa pletehan.

Nasayran nga si Atty. Manuel Iway, kanhi direktor sa LTFRB ug maoy usa sa mga petitioner mi-insister nga angay nga P2   ang ipatumang rollback sa pletehan aron mabalik sa P6 ang minimum nga pletehan nunot niining dako na nga rollback sa presyo sa produktong petrolyo. – BANAT NEWS