Sundalo, nurse, menor gipangdunggab

CEBU - Nakalingkawas sa kamatayon ang usa ka retiradong sundalo, nurse ug menor de edad human mabiktima sa pagpanunggab sa managlahing dapit dinhi sa dakbayan sa Sugbu niadtong miaging gabii ug miaging kadlawon.

Nalandig sa Cebu City Medical Center (CCMC) niadtong Sabado sa gabii ang biktimang si Roel Abellar, 13, grade one, kinsa nakaangkon og samad dinunggaban sa iyang buko-buko human madunggabi diha sa F. Calderon Street, barangay Ermita sa usa usab ka menor de edad gamit ang kutsilyo.

Base sa imbestigasyon sa kapolisan nga si Abellar ang ni-uwang unta kini sa panagsumbagay sa suspetsado ug sa maguwang sa biktima apan kalit lang gihansakan sa suspetsado.

Hinuon ang suspetsado ang bulontaryong mitahan sa iyang kaugalingon diha sa ilang barangay hall.

Sa maong adlaw, usa ka retiradong sundalo nga si Marthy Bantilan Sr., 56-anyos, ang nalandig sa tambalanan human dunggaba diha sa luyong bahin sa CSC building sa sitio Sudlon, barangay Lahug niining dakbayan ang nakaangkon og samad dinunggaban sa walang bukton human dunggaba sa hubog nga si Roland Sonido, 19, taga Top Hills sa maong barangay.

Sa imbestigasyon nila ni SPO2 Rey Cuyos sa Homicide Section sa Cebu City Police Office nga hubog ang suspetsado dihang nagsulod gawas sa internet café nga gipanag-iya sa anak sa biktima nga si Marthy Jr. diha sa nahisgutang lugar.

Matud sa biktima nga nakit-an niini ang suspetsado nga nagsige og sulod gawas sa internet ug nagpunay sa pagbira-bira sa pultahan hinungdan nga iyang gibadlong apan gikasuko kini ni Sonido.

Gitulod sa biktima si Sonido kinsa nipauli apan samtang naglakaw kini nagsinggit sa pagpanghagit og “gubat pinatyanay”.

Pila ka minutos nibalik si Sonido nga wala mabantayi sa biktima ug sa walay daghang pangutana gihansakan niini si Bantilan sa dalang kutsilyo.

Si Sonido   nasikop nila ni PO3 Jaime Appare ug PO2 Erwin Ramos Picquero sa Mobile Patrol Group.

Samtang pagka-alas 2:00 sa kadlawon kagahapon, usa ka Reynaldo Bahag, 23, Nursing student sa usa sa mga unibersidad ning dakbayan ang nakaangkon og buslot sa kilid human dunggaba sa silingan niining menor de edad diha sa sitio Santo Niño barangay Suba.

Si Bahag nakaangkon og samad dinunggaban sa tuong bahin sa kilid.

Base sa imbestigasyon sa kapolisan nga ang suspetsado ug ang biktima ang nagkalalis human ang maong menor ang gipasanginlang mikawat sa purol ni Bahag. – BANAT NEWS