Judiciary Equalization Fund tukoron

CEBU - Gisugyot karon sa konseho sa dakbayan sa Sugbu ngadto sa Korte Suprema ang pag-establisar ug Judiciary Equalization Fund.

Kini pinaagi sa resulosyon nga gipalabang nila ni Konsehal Hilario Davide III, Gerardo Carillo, Joey Daluz ug Edgardo Labella nga pulos usab mga abogado.

Matud ni Davide kinsa mao usab ang acting vice mayor sa siyudad nga ang tumong sa JEF mao ang paghimong patas sa paghatag og allowance sa mga huwes.

Kini ilabi na kung ang usa ka lokal nga kagamhanan motuyo pagputol sa gihatag niining allowance sa mga huwes sa wala matino nga hinungdan.

Nagkanayon si acting Vice Mayor Davide nga ang kagamhanan sa dakbayan andam nga mogahin og usa ka milyon ka pesos nga kontribusyon alang sa JEF.

Nanghinaot si Davide nga mosunod ra sa siyudad ang ubang lokal nga kagamhanan aron malikayan ang mga pagduda nga ang mga huwes ubos sa impluwensya sa mga LGU’s.

Nasayran hinUon sa Banat News nga ang maong ideya iya ni mayor Tomas Osmena ug gipaambit ngadto nila ni Davide dihang kini mipauli sa Sugbu sa sayong bahin niining buwana.

Kini giingong nahuna-hunaan sa mayor human usab motumaw ang kontrobersiya nga giputlan sa Kapitolyo sa ilang allowance ang pipila ka huwes sa Regional Trial Court (RTC).

Ang kagamhanan sa lalawigan maghatagan og tag P6 mil nga monthly allowance ngadto sa mga huwes sa RTC, samtang tag P5 mil usab ang itunol sa City government.

Nanghinaot si Davide nga mosugot ang labaw'ng hukmanan sa ilang sugyot aron malikayan ang pagduda nga maimpluwensyahan ang mga huwes sa lokal nga kagamhanan. – BANAT NEWS